📰 रोहित आर्य एन्काऊंटर प्रकरणाला नवं वळण : धक्कादायक माहिती समोर

 

📰 रोहित आर्य एन्काऊंटर प्रकरणाला नवं वळण : धक्कादायक माहिती समोर

मुंबई | पवईतील ओलीस नाट्यप्रकरणाला आता नवं वळण मिळाले असून, या प्रकरणातील एन्काऊंटरवर गंभीर प्रश्नचिन्ह उपस्थित झाले आहे. १७ मुलांना ओलीस ठेवणाऱ्या रोहित आर्यच्या एन्काऊंटरविरोधात ॲडव्होकेट नितीन सातपुते यांनी गंभीर आरोप केले आहेत.

सातपुते यांनी सांगितले की, “सरकारकडून दोन कोटींची थकबाकी न मिळाल्यानेच आर्यने हे टोकाचे पाऊल उचलले. मात्र, हा एन्काऊंटर पूर्णपणे टाळता आला असता. पोलिसांनी जाणीवपूर्वक त्याचा खात्मा केला,” असा गंभीर आरोप त्यांनी केला आहे.

ते पुढे म्हणाले, “मुलांना ओलीस बनवणे हे नक्कीच चुकीचे कृत्य आहे. पण त्यासाठी थेट एन्काऊंटर करणे योग्य नव्हते. पोलिसांना त्याच्या पायावर गोळी झाडून त्याला जखमी करून अटक करता आली असती. मात्र त्याच्या छातीत गोळी घालण्यात आली, हे निश्चितच संशयास्पद आहे.”

या प्रकरणावर सखोल चौकशीची मागणी करत, ॲडव्होकेट सातपुते यांनी सांगितले की ते लवकरच न्यायालयात रीट याचिका दाखल करणार आहेत. “हा एन्काऊंटर म्हणजे पोलिस यंत्रणेच्या अपयशावर पडदा टाकण्याचा प्रयत्न आहे,” असे ते म्हणाले.

दरम्यान, या प्रकरणी पोलिसांनी अधिकृत भूमिका अद्याप स्पष्ट केलेली नाही. संपूर्ण घटनेचा तपास आता न्यायालयीन स्तरावर जाण्याची शक्यता आहे.