माध्यमिक विद्यालय, उंटवाडी क्रीडा महोत्सव उद्घाटन समारंभ संपन्न
महाराष्ट्र सुवार्ता वृत्तसेवा – नाशिक :
नाशिक एज्युकेशन सोसायटीच्या माध्यमिक विद्यालय, उंटवाडी येथे वार्षिक क्रीडा महोत्सवाचा भव्य उद्घाटन सोहळा संस्था उपाध्यक्ष व शालेय समिती अध्यक्ष चंद्रशेखर मोंढे यांच्या अध्यक्षतेखाली उत्साहात पार पडला. या कार्यक्रमासाठी विद्यालयाच्या माजी विद्यार्थीनी डॉ. प्राजक्ता पाटील प्रमुख पाहुण्या म्हणून उपस्थित होत्या.
कार्यक्रमास मुख्याध्यापक राजेंद्र कापसे, उपमुख्याध्यापक विजय मापारी, पर्यवेक्षक सूर्यभान जगताप, शशिकांत दंडगव्हाळ, शिक्षक प्रतिनिधी बाळासाहेब आहेर, पालक-शिक्षक संघ उपाध्यक्ष दिलीप रौंदळ, पा.शि. सहसचिव जगताप, शालेय पंतप्रधान रूद्र घरटे, शालेय खेळाडू, शिक्षक-शिक्षकेतर कर्मचारी व विद्यार्थी मोठ्या संख्येने उपस्थित होते.
खेळ आणि आरोग्य शिक्षणाची जनजागृती हा उद्देश
विद्यार्थ्यांमध्ये आरोग्य शिक्षणाची जनजागृती व्हावी, खेळाचे महत्त्व पटावे आणि शारीरिक तंदुरुस्तीबाबत सकारात्मक दृष्टिकोन निर्माण व्हावा या हेतूने क्रीडा विभागाच्या वतीने हा महोत्सव आयोजित करण्यात आला.
प्रमुख पाहुण्या डॉ. प्राजक्ता पाटील यांनी विद्यार्थ्यांना प्रेरणा देताना—
“नियमित व्यायाम करा, विविध खेळांमध्ये कौशल्य विकसित करा आणि मेहनतीशिवाय यशाला पर्याय नाही,”
असा मोलाचा सल्ला दिला.
उत्साहात पार पडला उद्घाटन सोहळा
कार्यक्रमाचे प्रास्ताविक मुख्याध्यापक राजेंद्र कापसे यांनी केले. पाहुण्यांचा परिचय ज्येष्ठ क्रीडा शिक्षिका मंगला मुसळे यांनी करून दिला. सूत्रसंचालन क्रीडा शिक्षक संदीप भगरे यांनी उत्तमरित्या पार पाडले, तर आभारप्रदर्शन ज्येष्ठ क्रीडा शिक्षक कैलास पाटील यांनी केले.
संस्था उपाध्यक्ष तथा शालेय समिती अध्यक्ष चंद्रशेखर मोंढे यांनी विद्यार्थ्यांना क्रीडा महोत्सवाच्या शुभेच्छा दिल्या. राज्यस्तरीय खेळाडू यश शिंदे यांनी विद्यार्थ्यांना शपथ दिली.
मृण्मयी घैसास यांच्या मार्गदर्शनाखाली शालेय गीतमंचाच्या विद्यार्थ्यांनी सादर केलेले क्रीडा गीत विशेष दाद मिळवून गेले.
स्काऊट-गाईड विभागाचे उपक्रम आणि विद्यार्थ्यांचा उत्स्फूर्त सहभाग
क्रीडा महोत्सवानिमित्त स्काऊट-गाईड विभागातर्फे ‘खरी कमाई सप्ताह’ आयोजित करण्यात आला. विविध खेळ, स्पर्धा आणि उपक्रमांमध्ये विद्यार्थ्यांनी उत्साहाने सहभाग घेतला व उल्लेखनीय यश संपादन केले.
वार्षिक क्रीडा महोत्सवाने विद्यालयात स्पर्धा, शिस्त आणि आरोग्यपूर्ण वातावरण निर्माण करत विद्यार्थ्यांच्या सर्वांगीण विकासाला चालना दिली.